જામનગર રોડ પર ન્યારા ગામ પાસે આવેલી સ્કૂલ ઓફ સાયન્સમાં ધો.11 માં અભ્યાસ કરતાં અને હોસ્ટેલમાં રહેતા મૂળ ભચાઉના તરુણનું હાર્ટએટેકના કારણે મોત નિપજતા પરિવારજનોમાં અરેરાટી મચી જવા પામી છે. 

બેભાન હાલતમાં હોસ્પિટલ ખસેડાયો હતો
પ્રાપ્ત વિગતો મુજબ ભચાઉના ભવાનીપૂરામાં રહેતા હાલ રાજકોટમાં ન્યારા ગામ પાસે આવેલી સ્કૂલ ઓફ સાયન્સમાં ધો.11 માં અભ્યાસ કરતાં યશરાજ જયેશ કુમાર સોલંકી ઉ.વ 16 આજે સવારે તબિયત લથડતા બેભાન હાલતમાં સારવાર અર્થે રાજકોટ સિવિલ હોસ્પિટલમાં ખસેડવામાં આવ્યો હતો. જ્યાં ફરજ પરના તબીબે હદય થંભી જતાં મોત નિપજ્યાનું જાહેર કરાયું હતું,બનાવ અંગેની જાણ થતાં પડધરી પોલીસ સ્ટેશનના પી.એસ.આઈ વી.કે.સોરાણી તથા રાઇટર મહિપાલસિંહ જાડેજાએ દોડી આવીને મૃતદેહને પી.એમ અર્થે ખસેડી ભચાઉમાં રહેતા પરિવારને જાણ કરી હતી. 

પિતા જયેશભાઈ ભચાઉમાં શિક્ષક તરીકેની ફરજ બજાવે છે
પોલીસ સૂત્રોએ જણાવ્યું હતું કે મૃતક યશરાજના પિતા જયેશભાઈ ભચાઉમાં શિક્ષક તરીકેની ફરજ બજાવે છે.તેમને સંતાનમાં એક દીકરી અને એક દીકરો છે. હોળી - ધૂળેટીના તહેવારો પરિવારજનો સાથે ઉજવણી કરીને ફરી રાજકોટ હોસ્ટેલમાં રહેવા માટે આવ્યો હતો.