રાજકોટ મહાનગરપાલિકા પોતાના જ સંફૂલો અને માલ મિલકતોના સંચાલનમાં નિષ્ફળ રહે છે અને ત્યારબાદ સંસ્થાઓને તેની લ્હાણી કરે છે અથવા તો ભાડેથી આપે છે. દરમિયાન આજે મળેલી સ્ટેન્ડિંગ કમિટીની મીટીંગમાં શહેરના રેસકોર્સ સંકુલ સ્થિત માધવરાવ સિંધિયા ક્રિકેટ સ્ટેડિયમમાં આવેલી ચાર સિમેન્ટ વિકેટો વાર્ષિક ફક્ત ૨.૨૫ લાખના ભાડેથી રેસકોર્સ ક્રિકેટ એકેડેમીને આપી દેવાનું મંજૂર કરવામાં આવ્યું હતું. જોકે આ માટે ટેન્ડર પ્રક્રિયા કરવામાં આવી હતી તેમાં ત્રણ એજન્સીના ટેન્ડર આવ્યા હતા તેમાંથી સૌથી વધુ ભાવ ઓફર કરનારને ભાડેથી આપવા નિર્ણય કરવામાં આવ્યો હતો. ક્રિકેટ કોચિંગનો ધંધો કરતી એકેડમીઓ વર્ષે લાખો રૂપિયા કમાય છે અને મહાપાલિકાને મામુલી રકમનું ભાડું ચૂકવે છે. બીજી બાજુ રાજકોટના સામાન્ય નાગરિકો ક્યારેય તેમના સંતાનોને આ સિમેન્ટ વિકેટમાં ક્રિકેટ રમાડી શકતા નથી. જો અહી ક્રિકેટ રમવું હોય તો એકેડેમીમાં મેમ્બરશીપ લેવી પડે છે અને તે મેમ્બરશીપની ફી પ્રતિ વ્યક્તિ દીઠ રૂ.૭૫૦થી ૧૫૦૦ સુધી વસૂલાય છે.

આ ઉપરાંત રેસકોર્સમાં બનાવેલા ટેનિસકોટ તો જાણે માલેતુજારો માટે જ બનાવવામાં આવ્યા હોય તેવી સ્થિતિ છે ચોક્કસ લોકો જ અહીં તેની ટેનિસ રમવા જાય છે સામાન્ય નાગરિકો ક્યારેય જોવા મળતા નથી. દરમિયાન રેસકોર્સ સંકુલના આ છ ટેનિસકોર્ડ વાર્ષિક રૂ.૧૭ લાખના ભાડેથી આલિયા ટેનિસ એકેડેમીને ભાડે આપી દેવામાં આવ્યા હતા આ અંગેની દરખાસ્ત સ્ટેન્ડિંગ કમિટીમાં સર્વાનુમતે મંજૂર કરાઈ હતી. આ ઉપરાંત અન્ય બે તેની સપોર્ટ ડીબી સ્પોર્ટ્સ એકેડેમીને વાર્ષિક રૂ.૪.૨૫ લાખના ભાડેથી આપવાનું સ્ટેન્ડિંગ કમિટીએ મંજૂર કર્યું હતું.