ઘોઘાસર્કલ નજીકથી  દારૂના જથ્થા સાથે ૩ મહીલા સહીત ૪ ઝડપાયા 
આજકાલ પ્રતિનિધિ-ભાવનગર
ભાવનગરના ઘોઘાસર્કલ પાસે શંકાસ્પદ રીતે ત્રણ મોટા થેલા સાથે ઉભેલા આડોડીયાવાસના ત્રણ મહીલા સહીત ચારને ક્રાઈમ બ્રાંચે ધરપકડ  કરી થેલાની તલાશી લેતા તેમાંથી વિદેશી દારૂની ૬૦૦ નાની બોટલ મળી આવતા બરામત કરી હતી.
  ભાવનગર લોકલ ક્રાઈમ બ્રાંચનો સ્ટાફ સીટી વિસ્તારમાં પેટ્રોલીંગમાં હતો. તે વેળાએ બાતમી મળી હતી કે, મહીલાઓ અને શખસ શહેરના ઘોઘા સર્કલ પાસે રોટરી કલબ નજીક રોડ ઉપર થેલાઓમાં વિદેશી દારૂનો જથ્થો ભરી ઉભા છે. જે હકીકત આધારે તપાસ કરતા જાહેર રોડ
પર ઉભેલા જયશ્રીબેન દિપકભાઈ રાઠોડ (ઉ.વ.૪૫, રે. ઢોરા ઉપર, આડોડીયાવાસ), તેજલબેન દિપકભાઈ પરમાર (ઉ.વ. ૪૦, રે. આડોડીયાવાસ), મીનાબેન રાકેશભાઈ રાઠોડ (ઉ.વ. ૩૫, રે. ઢોરા ઉપર, આડોડીયાવાસ) અને રોનીશ ઉર્ફે જીંગો નીતેશભાઈ પરમાર (ઉ.વ. ૨૦, રે. તિલકનગર, આડોડીયાવાસ) મળી આવતા તમામની અટક કરી તેઓના કબજામાં રહેલા ત્રણ થેલાની તલાશી લેતા તેમાં વિદેશી દારૂની જુદી જુદી બ્રાંડની ૯૦ એમએલની ૬૦૦ બોટલ મળી આવતા બરામત કરી ક્રાઈમ બ્રાંચે તમામ વિરુધ્ધ ઘોઘારોડ પોલીસ મથકમાં પ્રોહિબીશન એક્ટ તળે ગુનો દાખલ કરી આગળની કાર્યવાહી હાથ ધરી હતી.