ન્યૂયોર્કની એક નાઈટ ક્લબમાં ફાયરિંગની ઘટના સામે આવી છે. આ ઘટનામાં ઓછામાં ઓછા 11 લોકોને ગોળી મારી છે. ઘટનાને પગલે અમેરિકામાં ભયનો માહોલ ફેલાઇ ગયો છે. 

અમેરિકામાં ફરી મોટો હુમલો થયો છે. આ હુમલો ન્યૂયોર્ક ક્વીન્સ વિસ્તારમાં થયો હતો, જેમાં 11 લોકોને ગોળી વાગી હોવાના અહેવાલ છે. આ તમામ લોકો ઘાયલ છે. ન્યૂ ઓર્લિયન્સમાં હુમલાના બીજા જ દિવસે આ હુમલો થયો હતો, જેમાં શમસુદ્દીન જબ્બાર નામના વ્યક્તિએ નવા વર્ષની ઉજવણી કરી રહેલા લોકોની ભીડ પર ટ્રક ચડાવી દીધી હતી, જેમાં 15 લોકો માર્યા ગયા હતા. આ ગોળીબાર અમેરિકન સમય મુજબ રાત્રે 11.45 કલાકે થયો હતો.

પોલીસ કાફલો ઘટનાસ્થળે દોડી આવ્યો 
ઘટનાની જાણકારી મળતાં જ પોલીસ કાફલો ઘટનાસ્થળે દોડી આવ્યો હતો. પોલીસે જણાવ્યું કે અમને ઈવેન્ટ હોલમાં ફાયરિંગ થયાની જાણકારી મળી હતી. આ હુમલામાં ઘાયલોની સ્થાનિક હોસ્પિટલમાં સારવાર ચાલી રહી છે. હાલમાં પોલીસે ઘટનાસ્થળને કોર્ડન કરીને વધુ તપાસ હાથ ધરી છે. હુમલામાં બે લોકો સામેલ હોવાની પણ આશંકા વ્યક્ત કરાઈ રહી છે. હજુ સુધી કોઈ હુમલાખોર હાથમાં આવ્યો નથી.