LPG ગેસ સિલિન્ડરના ભાવમાં સરકારે 50 રૂપિયાનો વધારો કર્યો છે. ભાવ વધારાની જાહેરાત કરતા મંત્રી હરદીપ સિંહ પુરીએ કહ્યું કે અમે આગામી દિવસોમાં તેની સમીક્ષા કરીશું. LPG ગેસ સિલિન્ડરનો નવો ભાવ આવતીકાલથી અમલમાં આવશે. ગુજરાતમાં ગેસ સિલિન્ડરનો સરેરાશ ભાવ 809 રૂપિયા છે, જેના માટે હવે ગ્રાહકોએ 859 રૂપિયા ચૂકવવા પડશે. 

સરકારે શું કહ્યું?
સરકાર દ્વારા આપવામાં આવેલી માહિતી અનુસાર, મંગળવાર, 8 એપ્રિલ, 2025થી LPG ગેસ સિલિન્ડરના ભાવમાં 50 રૂપિયાનો વધારો કરવામાં આવી રહ્યો છે. આ વધારો બધા ગ્રાહકો એટલે કે ઉજ્જવલા યોજના અને ઉજ્જવલા સિવાયના ગ્રાહકોને લાગુ પડશે. તમને જણાવી દઈએ કે, પ્રધાનમંત્રી ઉજ્જવલા યોજના (PMUY) હેઠળ, ગરીબ મહિલાઓને મફત ગેસ કનેક્શન આપવામાં આવે છે. જેથી તેઓ સ્વચ્છ રસોઈ બળતણ એટલે કે LPG મેળવી શકે. આ યોજનાનો લાભ ગ્રામીણ વિસ્તારોની ગરીબ મહિલાઓને આપવામાં આવે છે. હવે, નવા ભાવો મુજબ, ઉજ્જવલા યોજના અને અન્ય ગ્રાહકો બંનેને ગેસ સિલિન્ડર માટે 50 રૂપિયા વધુ ચૂકવવા પડશે.

હરદીપ સિંહ પુરીએ શું કહ્યું?
કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ કહ્યું છે કે, LPG સિલિન્ડરના ભાવમાં 50 રૂપિયાનો વધારો કરવામાં આવશે. ઉજ્જવલા યોજના (PMUY)ના લાભાર્થીઓ માટે, ગેસ સિલિન્ડરની કિંમત હવે 500 રૂપિયાથી વધીને 550 રૂપિયા થશે, જ્યારે અન્ય ગ્રાહકોએ હવે 803 રૂપિયાને બદલે 853 રૂપિયા ચૂકવવા પડશે. કેન્દ્રીય મંત્રીએ કહ્યું કે આ નિર્ણય કાયમી નથી અને દર 2 થી 3 અઠવાડિયામાં તેની સમીક્ષા કરવામાં આવશે. આ સાથે તેમણે એ પણ સ્પષ્ટતા કરી કે પેટ્રોલ અને ડીઝલ પર વધેલી એક્સાઇઝ ડ્યુટીનો બોજ સામાન્ય લોકો પર નહીં નાખવામાં આવે. આ વધારો તેલ કંપનીઓને ગેસ વેચવામાં થયેલા રૂ. ૪૩,૦૦૦ કરોડના નુકસાનની ભરપાઈ કરવા માટે કરવામાં આવ્યો છે.