સપડા ગામના યુવાનનું ઉલ્ટીઓ બાદ બેભાન થવાથી મૃત્યુ

જામનગરના એરફોર્સ રોડ, રાજીવનગર કોલોનીમાં રહેતી એક મહિલાએ કોઇ અગમ્ય કારણસર ગળાફાંસો ખાઇ જીવાદોરી ટુંકાવી લીધી છે જયારે સપડા ગામમાં એક યુવાનનું ઉલ્ટીઓ થયા બાદ બેભાન અવસ્થામાં સારવાર દરમ્યાન મૃત્યુ નિપજયુ હતું.

શહેરના ખેતીવાડી વિસ્તાર, રાજીવનગર કોલોનીમાં રહેતા રાજુબેન મેઘજીભાઇ ભરાડીયા (ઉ.વ.77) નામના વૃઘ્ધાએ ગઇકાલે પોતાના ઘરે કોઇપણ કારણસર છતની આડીમાં ચુંદડી વડે ગળાફાંસો ખાઇ લેતા તેણીનું મૃત્યુ નિપજયુ હતું, આ બનાવ અંગે રાજીવનગર કોલોનીમાં રહેતા ભીખા મેઘજીભાઇ ભરાડીયાએ સીટી-સી પોલીસમાં જાણ કરી હતી.

બીજા બનાવમાં જામનગર તાબેના સપડા ગામમાં રહેતા હિતેશ જીવરાજભાઇ ઝાલા (ઉ.વ.44) નામના યુવાનને તેમના ઘરે ઉલ્ટીઓ થતા અને બેભાન થઇ જતા જી.જી. હોસ્પીટલ સારવાર માટે ખસેડવામાં આવ્યો હતો જયાં સારવાર દરમ્યાન તેમનું મૃત્યુ થયું છે. આ અંગે સપડા ગામમાં રહેતા દિલીપભાઇ ઝાલાએ પંચ-એમાં જાણ કરતા આગળની કાર્યવાહી હાથ ધરવામાં આવી છે.