ખંભાળિયા તાલુકાના કોટા ગામે રહેતા સૈયદ રેશમાબેન મોહમદ યુસુફ સીરાજી તારીખ 6-6-2021 ના રોજ કોટા ગામેથી ઉપલેટા જવા માટે પોતાના પતિ તેમજ સંતાનો સાથે મોટરસાયકલમાં નીકળ્યા હતા. ત્યારે જામજોધપુરના માર્કેટિંગ યાર્ડ પાસેથી પસાર થતાં એક ટ્રેક્ટરના ચાલક મગનભાઈ ગંગદાસભાઈ બાકોરીના ટ્રેક્ટર સાથે તેમનું મોટરસાયકલ અથડાયું હતું. જેના કારણે અરજદાર રેશમાબેનને નાની-મોટી ઈજાઓ સાથે હોસ્પિટલમાં સારવાર આપવામાં આવી હતી.

જે અંગે વીમા કંપની પાસેથી રૂપિયા પાંચ લાખ મેળવવા માટેનો ક્લેમ દાખલ કરવામાં આવ્યો હતો. આ કેસ ખંભાળિયાના મોટર એકસીડન્ટ ટ્રિબ્યુનલ સમક્ષ ચાલી જતા અરજદાર પક્ષે તેમના ક્લેમની અરજીમાં દર્શાવેલી હકીકતો સાબિત કરવામાં નિષ્ફળ થતાં સામાવારાના તરફેણમાં કરવામાં આવેલી દલીલો તેમજ હાઈકોર્ટના ચુકાદાઓ એડવોકેટ પ્રતીક એમ. જોશી દ્વારા રજૂ કરવામાં આવતા મગનભાઈ બાકોરી તથા વીમા કંપનીને આ ક્લેમ કેસમાંથી દોષ મુક્ત કરવાનો હુકમ કર્યો છે.

સાથે આ અકસ્માત અરજદાર મહિલાના પતિની બેદરકારીથી બનવા પામ્યો હોવાનું જણાવી, તેમને રૂ. 3,39,888 નું 6 ટકા વ્યાજ સાથે વળતર ચૂકવવા પણ નામદાર પ્રિન્સિપાલ એન્ડ સેશન્સ કોર્ટ દ્વારા હુકમ કરાયો છે.